你可能覺得我講得有啲誇張，而家先3月中旬咋，年度洗腦神曲？咁早就落結論？冇錯，雖然係早咗少少，不過首歌你聽完就知有幾神。
你見過神一樣的隊友，合唱神一樣的金句嗎？基仔 X 子華神破天荒合唱全新歌曲<子華說>。
兩位男神破天荒合唱已經夠嗮興奮，再睇下填詞人同作曲編曲監製久違嘅合作，你就知道呢個組合出歌，非聽不可。
填詞：林夕，作曲：雷頌德，編曲：雷頌德，監製：雷頌德，RAP歌詞：黃子華。
「你快樂過生活 我努力去生存」。生活在最艱難的時候，有時一個笑話就好似一劑止痛藥，令你煩惱一掃而空，繼續拼搏。對於香港人來說，當中最有鎮痛作用的，莫過於是黃子華幾十年來在棟篤笑留下的經典金句。
話說，這支鎮痛劑也不止醫好香港人的「傷患」，對於廣大子華神的粉絲也同樣適用，因為神的覆蓋範圍真的很廣。
說回首歌創作來源。正在籌備5月紅館演唱會和全新廣東專輯的古巨基，今次專輯概念是香港故事，當中有不同題材的歌曲都會令香港人感同身受。
咁啱得咁巧，子華神今年7月份一連17場紅館（估計會再加場）棟篤笑同樣是香港本土題材入題，兩位老友的合作，簡直是一拍即合。
基仔話︰子華在棟篤笑的金句，最能道出香港人在生活中的心聲。例如愛情、上班族、生活日常等，無論乜年紀聽到，都能從中找到共鳴位，讓你會心微笑。
阿叔作為子華神小粉絲一枚，覺得基仔講得巧有道理，棟篤笑長久不衰，越發越有魅力，話題豐富，政治經濟文化無所不談，誘惑人笑有共鳴度之餘，內容又值得人深思。
繼續講返首歌。<子華說>，顧名思義，歌曲包涵著大量子華在不同時期演出上的金句語錄，而今次製作有別以往，過去的專輯及歌曲都是從已有一個概念開始，然後跟林夕和監製商議在曲詞上如何配合。但今次的起點是由子華金句開始，所以一開始就有豐富金句內容要處理。
子華的金句如此多，如何有序按類別放入歌詞，是首先需要解決的。基仔收集好金句內容，交給林夕分為生活和愛情兩大類及整合順序，最後再由雷頌德譜上不同段落的旋律，貫串成首歌曲。
在最後錄音時，子華加入一些即興的想法及演繹去豐富內容，得出今天大家聽到的最終版。
在歌曲的MV中，留意了，有夕爺罕有的出鏡，「真係橋到船頭自然直 定系船到橋頭變林夕」，看的時候，會感覺多年來看過的黃子華棟篤笑視頻，終於出現了曾腦補過的畫面，哈哈哈。
林夕+雷頌德+古巨基+黃子華，這個組合絕對是破天荒的合作，兩位男神發揮鬼馬本色穿插著的唱和rap，帶來了恰到好處的精彩。
帶你進入悲傷回顧往事勾人淚眼的歌，有很多，一首讓你邊聽邊笑又有共鳴的歌，非這首新歌莫屬。
古巨基、黃子華兩位今年都有大搞作，同樣在紅館有演出，聽完歌曲之後是不是都很想去現場了？畢竟很大機會，子華5月去基仔演唱會做嘉賓，而基仔7月去子華棟篤笑做嘉賓哦
。
《子華說》
詞：林夕
曲：雷頌德
編：雷頌德
監：雷頌德
RAP歌詞：黃子華
黃：
喂喂喂 世界好簡單
但係人類好覆複雜
係咁㗎啦 好出奇啊
搵食啫 犯法呀 我想㗎
古：
神救贖人世 靠笑穴
能誘惑人笑 要夠絕
人生有什麽 好喜悅
子華說 子華說
黃：
喇各位我哋唔係唔負責嘅人
為咗爸爸媽媽短短一剎那嘅快樂
我哋負責咗幾十年喇
真係橋到船頭自然直啊
定係船到橋頭變林夕啊
拉拉鏈又一日 唔拉拉鏈又一日
無人搵你做野你咪
當自己係偉大嘅藝術家囉
生勾勾嘅時候係
唔會得到應有嘅尊重
我恭喜你
你仲偉大過偉大嘅藝術家
死咗都無人尊重啊
不過輸少當贏啦
係輸凈少少都當係贏
哎呀 若要人不知 唔好咁低 b
古：
要笑到低脂
這世界 被人笑
令人笑 是頭等善事
醜不醜 要自知
當作表演趣劇夠睿智
黃：
我好鐘意返工啊
你話唔係鬼上身點講得出啊
真係做隻貓 做隻狗
做隻出位的馬仔
老闆 點解我可以做得咁差
其實我可以做得差啲
出俾你果份唔係糧 係賠償
雖然話一千幾百 猶如垃圾
富貴於我如浮雲
但係浮雲於我如命根
我地滿身傷痕
身無分文 之但係 buffet不妨食過份
出貓豈容你太高分啊
哎喲返工緊係睇鐘
今日最希望係聽日打風
搵食啫 犯法呀 我想㗎
古：
神救贖人世 靠笑穴
能誘惑人笑 要夠絕
棟篤笑大家 的死穴
回水要自嘲 花心血
人類若 那麽易笑不必我賣笑
玩幽默去拯救這眾生
將苦水 飲到喜悅
子華說 子華說
黃：
喂喂喂你仲唱
失戀唱情歌 即係漏煤氣閂窗
愛情呢家嘢 你預左唔 OK 你就 OK
你唔中意我 我憎你
你中意我 我唔信你
問世間情為何物
情侶裝係唔怕核突
初戀之前 小龍女只需要靚
靚就唔洗扮啊 扮就唔謊靚啊
個時真係膚淺啊嘛
喇依加個人成熟咗就知道啊
原來身材都好重要啊
一個頂級嘅紅顏
係會帶嚟頂唔順嘅麻煩
化妝變做喬裝 呢啲就叫做公關
古：
關公最慘 好孤單 好正經
不愛玩 沒情愛愁煩
AB餐 揀正餐 揀野餐
至少有條件 鬥煩
黃：
愛情同股票一樣
未入之前會不停咁升
一但到手 就會掉頭咁走
你仲夠膽擺酒
唔怕嘥咗條魚 嘥咗隻雞
同嘥埋隻狗
你愛嘅 你得唔到
你唔愛嘅 你甩唔到
男人對愛情最緊要嘅係新鮮
但係女人最緊張就係保鮮
你從來都無愛過我
你對我已經唔係好似以前咁
唉 夜半訴心聲 何需太高清
一句到尾 一句到尾 一句到尾
愛講是沒有用的 做啦
古：
神救贖人世 靠笑穴
能誘惑人笑 要夠絕
棟篤笑大家 的死穴
回水要自嘲 花心血
人類若 那麽易笑不必我賣笑
玩幽默去拯救這眾生
將苦水 飲到喜悅
子華說 子華說
作者： 阿叔今年四十歲
轉自：撻著廣東歌